السجة البعيدة ....

يا سجّه البعيده اشلون اصل ليكـ
ونه المكَسور جنحي وبس اعاني

خذك مني زماني وجاب طاريكـ
ورمه بسهمه الوكَت ولون لفاني

اثر نيشان حبك جذب ناسيكـ
احس بروح تمشي وباقي اتاني

مفتوح الكَلب مالك تدكَه اشبيكـ
مــــــا مقفول حبك زنجّراني

اخاف اشبيه منك انه وعليكـ
يجي غيركَ يذمني اشكَد اعاني

اهي ليلية كدر من نمت ناسيكـ
اويجيني بطيف اسمك عكَزاني

انه العايش ابأسمك زرع وجنيكـ
اخاف احصد وخاف اخسر تراني

خسرت اسنين يابو سنين احاجيكـ
وريد اربح امبارك بسمك اني

يسلوى اسمك عليه اشلون ابديكـ
اموتــــــــــاً لو اسم غيركَ نداني

اشكثر اسماء يمك بس اناديكـ
لآن اسمـــــك عليهم هل اماني

يروحي اسمك وسطهم نغم تاليكـ
تعزف علوتر اجمل اغانــــــــــــي

خلص عمري ونه بدمعات بانيكـ
وحس كَلبي بغيابـــك فلشاني

اريداً دوم اسمك طب وداريكـ
ونه الماشوف وغيابك عماني

وظل اصفن وحرك الشفه اطريكـ
وصف دكَتور اسمك على الساني

وصف دكَتور اسمك على الساني

اريدك فرحه بكَليبي شفتهــــــــة
ونشف بيك دمعه الـمن شفتهــــة
محلاهة ابورد جوري شفتهــــــة
وصف دكتور بس بيهة المنيه